ЭМЯ-наас коронавируст халдварын нөхцөл байдлын талаарх ээлжит мэдээллээ хийлээ. Өнгөрсөн 24 цагийн хугацаанд 1015 тохиолдол шинээр бүртгэгдэж, нийт тохиолдол 40396 болж нэмэгдэж байна. Шинээр илэрсэн тохиолдлуудын 998 нь дотоодоос бүртгэгдсэн бол 16 нь гадаадаас зөөвөрлөгдөн ирсэн буюу тусгай үүргийн онгоцоор Энэтхэгээс ирсэн иргэдийн давтан шинжилгээнээс илэрчээ. Энэтхэгийн иргэд Дорноговь аймагт тусгаарлагдаад байгаа аж. Эмнэлгийн шалтгаант буюу ковидын улаан бүсэд ажиллаж байсан нэг эмнэлгийн ажилтан халдвар авсан байна. Өнгөрсөн нэг хоногт долоон иргэн ковидын улмаас нас барсан байна.
Орон нутагт 50-иас дээш насны иргэдээ вакцинд хамруулах ажил эхэлсэн. Дархлаажуулалт хэвийн үргэлжилж байгаа гэдгийг ЭМЯ-наас мэдээллээ. Улаанбаатар хотод 114 цэгээр 18-аас дээш насны иргэдээ вакцинжуулж байна. Нийт 2310 эмч, эмнэлгийн ажилтнууд дархлаажуулалтад ажиллаж байгаа аж. Иргэд вакцин хийлгэхдээ өөрийн хувийн мэдээллээ маш сайн нягталж шалгахыг эрүүл мэндийн байгууллага анхаарууллаа. Вакцинд хамрагдсан иргэдийн овог, нэр бусад мэдээлэл зөрөх тохиолдол гарч байгаа аж.
