Татварын орлого 78.1 хувийн гүйцэтгэлтэй байна

Гаалийн байгууллага улсын төсөвт оны эхний дөрвөн сард өссөн дүнгээр 1.1 их наяд төгрөгийн татварын орлого оруулахаас 853.9 тэрбум төгрөгийг төвлөрүүлжээ. Төсвийн татварын орлого 78.1 хувийн гүйцэтгэлтэй байна. Энэ нь өнгөрсөн оны мөн үеэс 195.9 тэрбум төгрөгөөр илүү байна. Манай улс 2021 онд 10.8 их наяд төгрөгийн татварын орлого олохоор төлөвлөсөн бөгөөд оны эхний хоёр сарын байдлаар улсын төсвийн орлого 1.6 их наяд төгрөг болоод байв. Сангийн яам болон Татварын ерөнхий газрын мэдээгээр төсвийн орлого одоогийн байдлаар өнгөрсөн оныхоос 17.5 орчим хувиар нэмэгджээ. Эдийн засгийн идэвхжлийн үндсэн үзүүлэлт дотоодын НӨАТ-ын орлого 26 хувиар давж, өнгөрсөн оны мөн үеэс 20 тэрбум төгрөгөөр нэмэгджээ. Мөн ААНийн орлогын албан татвар өнгөрсөн оны мөн үеэс 60 гаруй тэрбум төгрөгөөр давж, төлөвлөсөн хэмжээнээс 40 орчим тэрбум төгрөгөөр нэмэгдээд байгаа эерэг үзүүлэлттэй байна. Монгол Улсын энэ оны төсвийг 11.8 их наяд төгрөгийн орлого олох, 13.9 их наядын зарлагатай, 2.1 их наядын алдагдалтай байхаар баталсан юм. 2021 онд уул уурхайгаас 3.4 их наяд төгрөгийн орлого төвлөрүүлэхээр тооцсон. Нэг ёсондоо энэ онд уул уурхайгаас олох орлого төсвийн 26 хувийг бүрдүүлэх юм.