АНУ-ын ерөнхийлөгч Дональд Трамп зургаадугаар сарын 26-нд олон нийтийн сүлжээнд нийтлэл бичиж, Америкийн компаниудад дижитал үйлчилгээний татвар ногдуулж буй Европын орнуудад 100 хувийн хариу татвар ногдуулна гэж мэдэгджээ.
Трамп хэлэхдээ, холбогдох дижитал үйлчилгээний татвар хэрэгжиж эхэлбэл хариу татварыг даруй хэрэгжүүлнэ гэжээ. Гэвч тэрбээр энэхүү арга хэмжээний хууль зүйн үндэслэлийг дурдсангүй.
Трампын хэлснээр, Европын олон улс Америкийн компаниудад дижитал үйлчилгээний татвар ногдуулах асуудлыг хэлэлцэж байгаа бөгөөд зарим улс тун удахгүй уг татварыг бодитоор авч магадгүй байна. Тэрбээр ийм төрлийн дижитал үйлчилгээний татвар ногдуулсан аливаа улс Америкт экспортлох бүх бүтээгдэхүүндээ 100 хувийн татвар ногдуулах хариу арга хэмжээнд шууд өртөх болно. Энэхүү татвар нь Америк болон холбогдох улс орнууд хооронд байгуулсан худалдааны хэлэлцээрийг орлох бөгөөд тухайн хэлэлцээрүүд гарын үсэг зурсан эсэх, хэрэгжиж эхэлсэн эсэхээс үл хамаарна гэжээ.
Сүүлийн жилүүдэд Европын хэд хэдэн улс Гүүгл, Амазон, Эппл зэрэг технологийн компаниудын өөрийн нутаг дэвсгэр дэх үйл ажиллагаанд дижитал үйлчилгээний татвар ногдуулахыг идэвхтэй дэмжиж ирсэн бөгөөд үүнийг Америкийн тал эрс эсэргүүцсээр байна.
Трамп энэ оны эхээр Франц, Их Британид татварын хариу арга хэмжээ авна хэмээн хэд хэдэн удаа сүрдүүлж байсан юм. Францын ерөнхийлөгч Эммануэль Макрон өмнө нь хэлэхдээ, Франц улс Америкийн заналхийлэлд автан Америкийн технологийн томоохон компаниудад ногдуулж буй дижитал татвараа цуцлахгүй гэж мэдэгдэж байжээ.
