Төсвийн тогтвортой байдлын зөвлөл Монгол Улсын 2025 оны нэгдсэн төсвийн гүйцэтгэлд дүгнэлт хийжээ. Уг дүгнэлтэд, Монгол Улсын нийт гадаад өрийн дүнд Засгийн газрын гадаад өрийн үлдэгдлийн эзлэх хувь жил ирэх тусам өссөөр байгаа нь дунд болон урт хугацаанд Засгийн газрын өрийн тогтвортой байдалд сөргөөр нөлөөлөхөөр байгааг онцолсон байна.
Монгол Улсын нийт гадаад өр 2025 оны гүйцэтгэлээр 40,277.4 сая ам.доллартой тэнцэж байгаа бөгөөд үүнээс Засгийн газрын гадаад өрийн үлдэгдэл 8,750.23 сая ам. доллар болж, улсын нийт гадаад өрийн 22.0 хувийг эзэлж байна. УИХ-аар 2026 оны 5 дугаар сарын 22-ны өдөр батлагдсан “Гадаад зээлийн ашиглалт, үр ашгийг нэмэгдүүлэх тухай” хуулийн дагуу ирэх жилүүдэд “Газрын тос боловсруулах үйлдвэр барих төсөл”-ийн БНЭУ-ийн зээл, “Эрдэнэбүрэнгийн усан цахилгаан станц барих төсөл”-ийн БНХАУ-ын зээлийн ашиглалт тус тус нэмэгдсэнээр Монгол Улсын нийт гадаад өрийн үлдэгдэл болон Засгийн газрын гадаад өрийн үлдэгдэл өсөх нь тодорхой бөгөөд дунд болон богино хугацаанд Монгол Улсын болон Засгийн газрын гадаад өрийн тогтвортой байдалд муугаар нөлөөлж, Монгол Улсын зээлжих зэрэглэлд сөрөг үр дагавар учруулах эрсдэлтэй байна гэж үзжээ.
