Өнөөдөр /2026.05.29/ “Эрдэнэс Монгол” ХХК-ийн Гүйцэтгэх захирал Б.Даваадалай болон удирдлагууд Олон улсын валютын сангийн Монгол дахь суурин төлөөлөгч Тигран Погосяныг хүлээн авч уулзлаа.
Уулзалтын эхэнд Монгол Улсын Засгийн газар “Эрдэнэс Монгол” нэгдлийг хөрөнгийн удирдлага, баялгийн сангийн менежмент, IPO, хувьчлал хариуцсан санхүүгийн институт болгон шинэчлэн өргөжүүлж буй талаар танилцуулав.
Энэ хүрээнд ОУВС баялгийн сангийн удирдлага, ил тод байдал болон засаглалын чиглэлээр улс орнуудтай хамтран хэрэгжүүлдэг техникийн туслалцаа (TA)-ны хөтөлбөрт хамрагдах боломжийн талаар санал солилцлоо.
ОУВС баялгийн сангийн үйл ажиллагааг урт хугацаанд тогтвортой авч явахад
• Ил тод байдал,
• Хараат бус төлөөлөн удирдах зөвлөл,
• Хөндлөнгийн аудит,
• Эрсдэлийн удирдлага,
• Улс төрөөс ангид байдал,
• Урт хугацааны хөрөнгө оруулалтын стратеги,
• Хямралын үеийн менежмент гэсэн чиглэлээр шилдэг туршлага нэвтрүүлж, улс орнуудтай хамтран ажиллаж байна.
Тухайлбал дэлхийд хамгийн амжилттай үйл ажиллагаа явуулж буй баялгийн санд тооцогддог Норвеги Улсын Government Pension Fund Global болон Бүгд Найрамдах Казакстан Улсын Самрук-Казынад зөвлөмж өгч ажиллажээ.
