АНУ-ын Ерөнхийлөгч Доналд Трамп Ирантай хийх хэлэлцээний талаар мэдэгдэл хийх үеэрээ “нааштай ямар нэг зүйл болно” хэмээн онцолжээ. Түүнчлэн Иран цөмийн зэвсэггүй байхыг зөвшөөрсөн гэдгийг цохон тэмдэглэсэн байна.
“Иран хэлэлцээр байгуулахыг хүсэж, бид тэдэнтэй тун нааштай хэлэлцээ хийж байгаа. Бид цөмийн зэвсэг бүтээхийг хүлээн зөвшөөрч болохгүй, энэ бол нэн чухал хүчин зүйл. Тэд хоёр сарын өмнө энэ нөхцөлийг зөвшөөрөхгүй байсан бол одоо ийм алхам хийхдээ бэлэн байна” гэж АНУ-ын Ерөнхийлөгч мэдэгджээ.
Түүний мэдэгдсэнээр дараагийн хэлэлцээ ирэх амралтын өдрүүдэд болж магадгүй гэнэ. Түүнчлэн сэтгүүлчдийн асуултад хариулах үеэрээ “Иран хэлэлцээ хийхгүй бол дахин цохилт өгч магадгүй” гэсэн утга бүхий хариулт өгсөн байна.
Эх сурвалж: CNN
