Монгол Улсын Ерөнхий сайд Г.Занданшатар Бүгд Найрамдах Энэтхэг улсаас Монгол Улсад суугаа Онц бөгөөд Бүрэн эрхт Элчин сайд Атул Малхари Готсурве-г хүлээн авч уулзлаа. Тэрбээр манай улсын “Оюун санааны хөрш”, бүс нутаг дахь чухал түнш бөгөөд “Гуравдагч хөрш” Энэтхэг улстай хөгжүүлж буй “Стратегийн түншлэл”-ийн харилцааг гүнзгийрүүлэхэд Засгийн газар өндөр ач холбогдол өгдгийг тэмдэглэн хэллээ.
Уулзалтаар талууд хоёр улсын харилцааны бэлгэ тэмдэг болсон Газрын тос боловсруулах үйлдвэрийг ашиглалтад оруулахаар хийж буй ажлыг шуурхайлж, зарим бодит алхам хийхээр тогтлоо.
Манай улсын эдийн засгийн тэргүүлэх салбарууд болох уул уурхай, эрчим хүч, боловсролын салбарт хамтран тодорхой төсөл, хөтөлбөрүүд амжилттай хэрэгжиж буйд Ерөнхий сайд Г.Занданшатар сэтгэл хангалуун байгаагаа илэрхийллээ.
Элчин сайд А.М.Готсурве хоёр улсын “Стратегийн түншлэл”-ийн хүрээнд Газрын тос боловсруулах үйлдвэр байгуулах төсөл хамгийн чухал гэдгийг онцолж, үйлдвэрийг аль болох эрт ашиглалтад хүлээлгэн өгөхөөр ажиллаж байгааг тэмдэглэн хэлэв.
2025 онд Монгол Улс, БНЭУ-ын хооронд дипломат харилцаа тогтоосны 70 жилийн ой тохиож байна.
