Шинэ жилийн баяр сарын турш үргэлжилнэ. Байгууллага, хамт олон, сум, аймаг, ангийнхан, төгсөлт, гэр бүлийн найзууд гээд олон шинэ жилд орно. Дараа нь залгаад Цагаан сар болно. Наана нь Валентины баяр. Тэгээд Мартын 8, Цэргийн баяр. Монголчуудын баяр ёслол бүхэн архи, согтууруулах ундаагүй болно гэж үгүй. “Архи идээний дээж” гэсэн улиг болсон үгээр зохисгүй хэрэглээ, хандлагаа цагаатгана.
Гэтэл үүний цаана архины хэтэрсэн хэрэглээ, донтолт, өвчлөл бий болж байдаг. Мэргэжлийн эмч нар “Архи бол идээний дээж биш сэтгэцэд нөлөөлөх, мансууруулах бодис” гэдгийг онцолж буй юм.
“Монгол Улсын Ерөнхийлөгчийн санаачлан хэрэгжүүлж буй “Эрүүл монгол хүн” үндэсний хөдөлгөөний хүрээнд “Амсахгүй бол Харамсахгүй” аян орон даяар хэрэгжиж байгаа билээ. Аяны хүрээнд донтох эмгэг судлалын мэргэжилтнүүдийн зөвлөгөө, ярилцлагыг цувралаар хүргэж байна.
