Дорноговь аймгийн Хатанбулаг суманд ирэх хоёрдугаар сарын 8-10-ны өдрүүдэд “Түмэн тэмээний баяр” малчдын нэгдсэн өдөрлөг зохион байгуулахаар болжээ. Тэмээн сүргийг өсгөн үржүүлэх, тэмээг уналга, эдэлгээнд сургах, малчид тэмээчдийн идэвх оролцоог нэмэгдүүлж, тэмээний холбогдолтой өв соёлыг сэргээн хөгжүүлэх зорилготой энэхүү өдөрлөгийн үеэр сайхан хос шалгаруулах тэмцээн зохион байгуулах юм байна. Мөн сайхан ат, ингэ, буур шалгаруулна. Тэмээтэй жагсаал, тором, тайлаг, бүдүүн тэмээний уралдаан, тэмээтэй буухиа тэмцээнүүд мөн болох аж.
Дорноговь аймгийн Хатанбулаг сум 2022 оны жилийн эцсийн мал тооллогын урьдчилсан дүнгээр нийт 322962 толгой мал тоолуулж, малын тоо толгойгоор аймагтаа тэргүүлсэн амжилтаа буухиалан хадгалжээ. Хатанбулаг сумын хэмжээнд 2022 онд мал сүрэг таван төрөл дээрээ өсөж, түмэн тэмээ, хоёр түмэн адуу тоолуулсан байна.
