Монгол Улсын Ерөнхийлөгч У.Хүрэлсүх Самарканд хотноо ШХАБ-ын Дээд түвшний уулзалтад оролцох үеэрээ НҮБ-ын Ерөнхий нарийн бичгийн даргын орлогч бөгөөд Ази, Номхон далайн Эдийн засаг, нийгмийн комисс /ESCAP/-ын Гүйцэтгэх нарийн бичгийн дарга Армида Алисжабанаг хүлээн авч уулзжээ. Энэ үеэр Ази, Номхон далайн Эдийн засаг, нийгмийн комисс /ESCAP/-ын Гүйцэтгэх нарийн бичгийн дарга Армида Алисжабана Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөнийг НҮБ талархан дэмжиж, дэлхий дахинд тулгамдаад буй уур амьсгалын өөрчлөлт, цөлжилтийн нөлөөллийг бууруулахад чухал үүрэг гүйцэтгэж байгааг нь өндрөөр үнэлж буйг онцлоод, цаашид энэ чиглэлд хамтын ажиллагааг улам идэвхжүүлэх эрмэлзэлтэй байгаагаа илэрхийлсэн байна. Түүнчлэн уур амьсгалын өөрчлөлттэй тэмцэх Монгол Улсын хүчин чармайлтад хувь нэмэр оруулах, НҮБ-ын АНДЭЗНК-оос “Ногоон бонд” (Green Bond)-ын хүрээнд хамтран ажиллахад бэлэн байгаагаа илэрхийлсэн аж.
НҮБ-тай Ногоон бондын хүрээнд хамтран ажиллана гэдэг уур амьсгалын өөрчлөлттэй тэмцэх Монгол Улсын санаачилгад асар том дэмжлэг болно гэсэн үг. Манайд ногоон хөрөнгийн зах зээлийг хөгжүүлэхэд үнэт цаасны бүртгэлийн ажиллагаа хүндрэлтэй, арилжааны банкнуудаас өөр төрлийн хөрөнгө оруулалтын институт байхгүй зэрэг олон асуудлууд бий. Гэхдээ нэн тэргүүнд хэрэгжүүлж эхлэх хэрэгтэй ажил бол Ногоон бонд гаргах гэдгийг Тогтвортой санхүүжилтийн холбооноос гаргасан “Ногоон хөрөнгийн зах зээлийн замын зураглал”-д тусгасан байдаг. Манай улс Парисын хэлэлцээрийн үед өгсөн амлалтаа биелүүлэхийн тулд байгаль орчин, нийгэмд ээлтэй бизнес болон төслүүдэд шаардлагатай санхүүжилтийг зуучилж өгөх даалгавартай тулгараад байгаа юм. Тухайлбал, хүлэмжийн хийн ялгарлыг бууруулах, тогтвортой хөгжлийн зорилтуудыг биелүүлэхэд нийт 111.5 тэрбум доллар шаардлагатай гэсэн тооцоо байдаг аж.
Ташрамд дурдахад өнгөрсөн гуравдугаар сард Монгол Улсын Ерөнхийлөгчийн ивээл дор зохион байгуулсан “Ногоон санхүүжилт, Бүс нутгийн чуулган”-ы үеэр Санхүүгийн тогтвортой байдлын зөвлөл Тогтвортой санхүүгийн үндэсний замын зургийн баримт бичгийг баталсан юм.
