Японы мэргэжлийн сүмо бөхийн 71 дэх их аварга Какүрюү М.Ананд зодог тайлж буйгаа албан ёсоор өнөөдөр зарлажээ. Японы сүмогийн холбооны удирдлагууд түүний зодог тайлах хүсэлтийг хүлээн авч зөвшөөрсөн байна. Өдгөө 35 настай их аварга Какүрюү М.Ананд сүүлийн таван башё дараалан бэртлийн улмаас барилдаж чадалгүй өнжих буюу тэмцээнийг дундаас нь орхисон юм. Тэрбээр зүүн өвдөгний бэртлийн улмаас өнгөрсөн оноос хойш ийнхүү башёд зодоглож чадаагүй тул ийм шийдвэр гаргажээ.
Мангалжалавын Ананд нь анх 2001 оны арваннэгдүгээр сарын башёд зодоглож байсан бөгөөд тэр цаг үеэс хойш Монголын их аваргуудын буухиаг үргэлжлүүлж, нийт 20 жил их сүмогийн ертөнцөд хүч үзсэн юм. Тэрбээр энэ хугацаанд мэргэжлийн сүмогийн дээд зиндаанд зургаан удаа түрүүлсэн амжилт үзүүлжээ.
Өнгөрсөн оны сүүлээр Японы мэргэжлийн сүмогийн холбооны Ёкозүнагийн зөвлөлөөс Хакүхо М.Даваажаргал болон Какүрюү М.Ананд нарыг олон башё дараалан өнжиж, мөн дундаас нь орхиж байна хэмээн анхааруулга өгөөд байв. Бөхчүүдийг эхлээд урамшуулж, дараа нь анхааруулга өгч, эцэст нь хүчээр зодог тайлуулдаг. Харин их аварга Какүрюү М.Анандын хувьд өөрийн хүсэлтээр зодог тайлахаар болсон нь энэ юм.
