Нийслэл Улаанбаатар хотоос Булган аймгийн Могод суманд очсон гурван иргэний нэг нь “Ковид-19”-ийн халдвар авсан болох нь шинжилгээгээр батлагджээ. Эдгээр иргэд 2021 оны гуравдугаар сарын 21-ний өдөр өглөө 10:00 цагийн орчим Могод суманд очсон бөгөөд мөн өдрийн орой 22:00 цагт Улаанбаатар хот руу буцсан юм байна.
Нөхцөл байдалтай холбогдуулан Булган аймгийн Онцгой комиссын шуурхай штаб яаралтай горимоор хуралдаж Хариу арга хэмжээний нэгдүгээр багийг Могод суманд томилон ажиллуулж байгаа аж. Тус хариу арга хэмжээний баг нийслэл Улаанбаатар хотоос ирсэн иргэдийн зорчсон маршрут, уулзсан иргэд, үйлчлүүлсэн дэлгүүр зэрэг ойрын хавьтал болох иргэдийн мэдээллийг тандан сумаас орж гарах хөдөлгөөнийг бүрэн хааж, ариутгал халдваргүйтгэл хийх ажлыг шуурхай зохион байгуулан ажиллаж байна.
Иймд иргэд баталгаагүй албан бус мэдээлэлд автахгүй байж, мэргэжлийн байгууллага, баталгаат эх сурвалжийн мэдээллийг хүлээн авч заавар, зөвлөмжийг дагаж мөрдөхийг анхааруулсан байна. Мөн болзошгүй эрсдэлээс урьдчилан сэргийлж, амны хаалтаа тогтмол зөв зүүж, олон хүн цугларсан газар очихгүй байх, хүн хоорондын зайг баримтлах, гэртэй зочин урихгүй байж, ариутгал халдваргүйтгэлийг тогтмол хийхийг Улс, аймгийн Онцгой комиссоос зөвлөж байна.
