Даян дэлхийн малчдын чуулга уулзалтын нэгдсэн хуралдаан Улаанбаатар хотноо хоёр өдөр үргэлжилж өнөөдөр өндөрлөлөө. Энэ сарын 9-15-ны өдрүүдэд үргэлжилсэн Даян дэлхийн малчдын чуулга уулзалтын хүрээнд орон нутгийн айлчлал, туршлага солилцох уулзалт, хэлэлцүүлэг, хамтын ажиллагааны үр дүнд боловсруулсан гурван тунхаглалыг албан ёсоор баталсан юм.
Уг гурван тунхаглалыг ирэх даваа гарагт эхлэх COP17-д хүргүүлэхээр хүлээлгэн өгөв. Тухайлбал, Малчдын ерөнхий тунхаглалыг Монгол Улсын Хүнс, хөдөө аж ахуй, хөнгөн үйлдвэрийн сайд Ц.Идэрбатад хүлээлгэн өглөө. Эмэгтэй малчдын тунхаглалыг НҮБ-ын Цөлжилттэй тэмцэх тухай конвенцын Гүйцэтгэх нарийн бичгийн дарга доктор Ясмин Фуад-д, Залуу малчдын тунхаглалыг Монгол Улсын Хүнс, хөдөө аж ахуй, хөнгөн үйлдвэрийн яамны Мал аж ахуй, генетик нөөцийн бодлогын хэрэгжилтийг зохицуулах газрын дарга Л.Чой-Иш нарт тус тус хүлээлгэн өгөв.
Эдгээр тунхаглалд даян дэлхийн малчид, эмэгтэй малчид, залуу малчдын тэргүүлэх асуудал, санал зөвлөмжийг нэгтгэсэн бөгөөд Цөлжилттэй тэмцэх НҮБ-ын конвенцын талуудын 17-р бага хурал (COP17)-ын хэлэлцүүлэгт хүргэх дараагийн шат эхэлж байна.
