БНХАУ, БНАСАУ-ын харилцаа түүхэн шинэ цэг дээр байна гэж Ши Жиньпин мэдэгджээ. Тэрбээр Пхеньянд хийж буй төрийн айлчлалынх нь үеэр зохион байгуулсан хүндэтгэлийн хүлээн авалтын үеэр ийнхүү мэдэгдсэн байна.
Хоёр орны уламжлалт нөхөрлөл олон улсын өөрчлөгдөн буй нөхцөл байдлын сорилтыг давж үеэс үед дамжин, улам бэхжиж байна хэмээн Ши Жиньпин онцолжээ. Түүнчлэн энэ удаагийн айлчлалын үеэр БНАСАУ-ын удирдагч Ким Жон Ун-тай чухал тохиролцоонд хүрсэн хэмээн цохон тэмдэглэсэн байна.
Харин Ким Жон Ун БНХАУ-ын дарга Ши Жиньпинийг хүрэлцэн ирсэнд талархал илэрхийлээд, Ши Жиньпин энэ оны анхны гадаад айлчлалаа чухамхүү БНАСАУ-аас эхэлсэн нь хоёр орны нам болон төр хоорондын харилцааны хөгжилд Хятадын төрийн тэргүүн онцгой ач холбогдол өгч байгааг харуулж байна хэмээн мэдэгджээ.
Эх сурвалж: Xinhua
