АНУ, Ираны хооронд энхийн хэлэлцээ байгуулахад саад болж буй асуудлуудын нэг болох Ираны баяжуулсан ураны нөөцийг нутагтаа байршуулахад бэлэн гэж Казахстан мэдэгджээ.
“Талуудын хооронд олон улсын тохиролцоо хийсэн нөхцөлд бид техникийн тусламж үзүүлэхэд бэлэн байна” гэж Казахстан улсын Гадаад хэргийн яамны төлөөлөгч Ерлан Жетыбаев мэдэгдсэн байна.
Казахстан улс сайн дураар цөмийн зэвсэггүй улс орон болсон гэдгээрээ алдартай. 1991 онд ЗХУ задарсны дараа Казахстан улс 1400 орчим цөмийн хошуутай үлдэж, 1995 онд эдгээрийг устган, цөмийн полигоноо хаан, цөмийн зэвсгээс татгалзаж байв.
Харин Иран улсын тухайд, 60% хүртэл боловсруулсан 440кг орчим ураны нөөцтэй гэж мэргэжилтнүүд үздэг. Энэ нь зэвсгийн материалд шаардлагатай хэмжээнээс харьцангуй бага хувь аж. Зэвсэг бүтээхэд 90% баяжуулсан байх шаардлагатай бөгөөд Иран одоо байгаа нөөцөө дахин баяжуулвал 10-12 цөмийн цэнэгт хошуутай болно гэж шинжээчид үздэг юм. Эдгээр нөөц АНУ, Израилын цохилтод өртөн сүйрсэн Ираны цөмийн объектуудын нурангийн дор байгаа гэж таамаглаж байгаа аж.
Эх сурвалж: Euronews, BBC
