ОХУ-ын цэргийн алба хаагчидтай хамтран цөмийн зэвсэг ашиглах сургуулилалтыг эхлүүлсэн талаар Бүгд Найрамдах Беларусь Улсын Батлан хамгаалах яам мэдэгджээ.
Энэ сургуулилалт нь бие бүрэлдэхүүнийг бэлтгэх, цэргийн техникийн бэлэн байдлыг шалгах, зэвсэг ашиглах бэлтгэл хийх зорилготой аж. Сургуулилалтад пуужин болон нисэхийн ангиуд татагдан оролцож, бэлтгэлийн явцад цөмийн зэвсгийг хүргэх, ашиглахад бэлтгэх асуудлыг боловсруулах юм байна.
Цөмийн зэвсэг ашиглах энэхүү сургуулилалт нь “гуравдагч орнуудын эсрэг чиглэгдээгүй, бүс нутагт аюул заналхийлэхгүй”, төлөвлөгөөт арга хэмжээ гэж Беларусийн Батлан хамгаалах яам цохон тэмдэглэжээ.
Харин Украин улс энэ сургуулилалтад онцгой анхаарал хандуулах шаардлагатай хэмээн үзэж байгаа аж. Беларусьт тактикийн цөмийн зэвсэг байршуулж, хоёр улс хамтран цөмийн сургуулилалт хийж байгаа нь дэлхий дахины аюулгүй байдалд асар их сорилт болж байна гэж Украины Гадаад хэргийн яам мэдэгджээ. Тиймээс барууны орнууд болон дэлхий дахин ОХУ, Беларусийн энэ үйлдэлд хатуу хариу барихыг уриалсан байна.
Эх сурвалж: ТАСС, ВВС
