УИХ дахь АН-ын бүлгээс төрийн албаны бүтцийг цомхотгох, 14 дэд сайдын томилгоог хүчингүй болгох шаардлагыг намрын чуулган завсарлахын өмнө Засгийн газарт тавьсан. Засгийн газрын өчигдрийн ээлжит хуралдаанаар АН-ын бүгийн тавьсан энэ шаардлагыг хэлэлцжээ. Ингээд зөвхөн дэд сайд нарыг цомхотгох төдийгүй төрийн албыг цомхон, чадварлаг болгох, бүтээмжийг нь сайжруулах чиглэлээр өнгөрсөн онд Засгийн газрын Хэрэг эрхлэх газраас хийсэн үнэлгээ, судалгаанд үндэслэн хуулийн төсөл боловсруулж УИХ-д өргөн мэдүүлэх зорилготой хамтарсан ажлын хэсэг байгуулахаар болжээ.
Ажлын хэсгийг УИХ-ын гишүүн, ЗГХЭГ-ын дарга С.Бямбацогт ахалж, Засгийн газар болон УИХ дахь АН-ын бүлгийн гишүүд бүрэлдэхүүнд нь багтах юм байна. Ажлын хэсгийн ахлагч С.Бямбацогт хэвлэлд өгсөн ярилцлагадаа,
“Өнгөрсөн хугацаанд Засгийн газар дарга нарын орон тоог цөөлөх бодлого барьж ажилласан. 58 Үндэсний хороог 29 болгосон. Яам, агентлагийн газрын дарга нарын тоог 400-аар цөөлсөн. Энэ ажлынхаа үргэлжлэл болгож төрийн албыг цомхон, чадварлаг, бүтээмжтэй болгох бодлогын хүрээнд УИХ, тэр тусмаа УИХ дахь сөрөг хүчинтэй хамтраад энэ ажлыг хийе гэж байгаа юм. Яамдын тоо, бүтэц, бүхэлдэхүүн дээр ч эргэж харах асуудлууд бий. Давхардсан чиг үүрэгтэй яамд бий. Тухайлбал, Эдийн засгийн хөгжлийн яамны гурван чиг үүрэг Шадар сайдууд дээр хуваагдаад, давхардсан байдалтай явж байгаа. Энэ мэтээр нийтлэгээр нь бүтцийн асуудлаас гадна хууль эрх зүйн болон төрийн албаны том шинэчлэлийг хэрэгжүүлнэ” гэлээ.
