Монгол Улсын Соёлын гавьяат зүтгэлтэн, соён гэгээрүүлэгч, яруу найрагч Л.Нямаа багшийн шавь, “Их засаг” олон улсын их сургуулийн төгсөгч П.Нарангэрэлийн “Чулуу дунших” номын нээлтийн ёслол “Их засаг” их сургуулийн Төв номын санд боллоо. Номын нээлтийн ёслолд МЗЭ-ийн болон утга зохиолын төлөө шагналт, яруу найрагч М.Баттөмөр, Монголын зохиолчдын шагналт яруу найрагч Г.Сонинбаяр, МЗЭ-ийн болон Г.Сэр-Одын нэрэмжит шагналт зохиолч, яруу найрагч Э.Эрдэнэдалай, МЗЭ-ийн шагналт яруу найрагч Э.Гантулга, яруу найрагч Д.Цээсэд, М.Даваадорж, Г.Батжавхлан, Ц.Одонтуяа, Энхбаяр, Г.Наранцогт нарын уран бүтээлчид, “Их засаг” Хүмүүнлэгийн ухааны сургуулийн яруу найргийн клубын оюутнууд оролцож, зохиогчийн бүтээлийн талаар санал сэтгэгдлээ илэрхийлэв.
Номын нээлтийн үеэр зохиогч уран бүтээлийнхээ агуулга, үзэл санааг танилцуулж, хүрэлцэн ирсэн зочид төлөөлөгчид баяр хүргэн үг хэллээ. Мөн Л.Нямаа багшийн шавь нар багшийнхаа төрсөн өдрийг тохиолдуулан жил бүрийн хоёрдугаар сард шинэ ном хэвлүүлж байхаар болсон бөгөөд яруу найрагч П.Нарангэрэлийн “Чулуу дунших” номоор ийнхүү салхийг нь хагалж байгаа ажээ.
