БНХАУ-ын Тяньжин хотноо зохион байгуулагдсан ШХАБ-ын дээд түвшний уулзалт өндөрлөж, зочид Бээжин хотноо иржээ. Энд өнөөдөр буюу 09 дүгээр сарын 02-ны өдөр Дэлхийн II дайн дууссан өдрийг тэмдэглэх юм.
Мөн өнөөдөр Монгол Улсын Ерөнхийлөгч У.Хүрэлсүх, ОХУ-ын Ерөнхийлөгч Владимир Путин, БНХАУ-ын дарга Ши Жинпинь нарын гурван талт дээд хэмжээний уулзалт болно. Энэ нь сүүлийн гурван жилийн хугацаанд Монгол Улс, ОХУ, БНХАУ дээд түвшний уулзалт хийж буй анхны тохиолдол юм.
Өнөөдрийн уулзалтаар Монгол Улсын нутгаар дамжуулан БНХАУ-д хий нийлүүлэх хоолойн асуудлыг хэлэлцэхээр төлөвлөж байгаа аж. “Сибирийн хүч-2” хоолойг барьснаар жилд 50 тэрбум куб.метр хий дамжуулна гэж тооцоолж байгаа. 2015 онд хэлэлцээрийн үндсэн нөхцөлийг баталсан бол хийн хоолой барих асуудлыг хамгийн сүүлд 2022 онд Самаркандад болсон ШХАБ-ын дээд хэмжээний уулзалтын үеэр хөндөн ярилцаж байв. ОХУ-ын зүгээс сүүлийн гурван жилд хийгдсэн ажлыг үнэлж дүгнэн, цаашдын алхмыг тохиролцох эрмэлзэлтэй байгаа аж.
