Хөнгөн атлетикийн 25 дахь удаагийн Азийн аварга шалгаруулах тэмцээн энэ сарын 12-ноос 16-нд Тайландын Бангкок хотод болж байна. Тэмцээний эмэгтэйчүүдийн 10 мянган метрийн гүйлтэд Олон улсын хэмжээний мастер Б.Мөнхзаяа 33:24.79 цагийн үзүүлэлтээр Монгол Улсын дээд амжилтыг шинэчлэн тогтоож, хүрэл медаль хүртжээ.
“Рио-2016”, “Токио-2020” олимпын наадам, “Лондон-2017”, “Доха-2019” ДАШТ-д эх орноо төлөөлөн оролцсон, Үндэсний шигшээ багийн тамирчин ОУХМ Баярцогтын Мөнхзаяа “Улаанбаатар марафон” олон улсын гүйлтийн тэмцээнд долоон удаа оролцож зургаад нь түрүүлж байсан юм. Тэрбээр Дорнод аймгийн уугуул багаад зэвсэгт хүчний 0327 дугаар ангийн артиллерийн дивизионы хангалт үйлчилгээний салааны няраваар ажилладаг, ахлагч цолтой алба хаагч юм.
