Голландын Амстердам хотод таван жил тутамд “SAIL Amsterdam” нэртэй усан онгоцны парад болдог байна. Уг парад ихэвчлэн наймдугаар сарын 19-нөөс 23-ны өдрүүдэд болдог бөгөөд энэ үеэр хөлөг онгоцууд дээр далайчдын найрал дуу, тэнгисийн цэргийн тулалдааныг харуулсан янз бүрийн үзүүлбэр, шоу, цэнгээнт арга хэмжээн болдог байна. Мөн далайн усан онгоцны зогсоол дээр зохиогддог SAIL хөтөлбөр жуулчдыг ихээхэн татдаг. Уг хөтөлбөрийн хүрээнд дуу хөгжим, спортын уралдаан тэмцээн, хүүхдүүдэд зориулсан арга хэмжээ зохион байгуулж, шөнийн цагаар салют буудуулдаг аж. Түүхэн болон өвөрмөц хийц загвартай хөлөг онгоцуудаас гадна үзэгчдийн олон мянган жижиг дарвуулт завь парадад нэгдэж, өвөрмөц дүр төрхийг бий болгодог байна.
Энэхүү арга хэмжээг анх 1975 оны наймдугаар сард Амстердамын 700 жилийн ойг тохиолдуулан “Sail Amsterdam 700” нэртэйгээр зохион байгуулж байжээ.
