Бээжингийн өвлийн олимп хаагдсанаас хойш хоёр долоо хоног хүрэхгүй хугацааны дараа Хятадын үндэсний цэнгэлдэх хүрээлэнд гуравдугаар сарын 4-ний баасан гарагийн орой Паралимпийн өвлийн наадам нээлтээ хийлээ. Хүртээмжтэй байдлыг уриагаа болгон онцолсон энэхүү Паралимпийн өвлийн наадмын нээлтийн ёслолд хөгжлийн бэрхшээлтэй хүмүүс болон нийгмийн бүхий л салбарын төлөөлөл, мөн уран бүтээлчид оролцсон байна.
2004 оны Афин, 2008 оны Бээжингийн паралимпийн уртын харайлт, гурвын харайлтын аварга Ли Дуан паралимпийн бамбарыг цасан ширхгийн хэлбэртэй аварга том тогоон дунд байрлуулснаар цаг гаруй үргэлжилсэн ёслол өндөрлөжээ.
“2008 онд Бээжин хот өвөрмөц онцлогтой, өндөр стандартын паралимпийн наадмыг зохион байгуулсан. Өнөөдөр 14 жилийн дараа Бээжин дахин Паралимпийн хөдөлгөөний төв болж байна. Бидний зорилго бол “Хоёр наадам, тэгш гайхамшиг”-т хүрч, дэлхийн хэмжээнд хялбар, аюулгүй, гайхалтай өвлийн Паралимпийн наадмыг үзүүлэх явдал юм” гэж “Бээжин 2022” паралимпийг зохион байгуулах хорооны дарга Цай Ци хэлжээ. Олон улсын паралимпийн хорооны ерөнхийлөгч Эндрю Парсонс хэлсэн үгэндээ Хятадын зохион байгуулагчдад талархал илэрхийлэв. Парсонс “Өөрчлөлтийг спортоор эхлүүлнэ. Энэ нь зөвхөн эв найрамдал авчрахаас гадна хүмүүс, хотууд, улс орнуудын амьдралыг өөрчлөх хурдасгуур болж чадна” гэжээ.
Бээжингийн өвлийн паралимпийн наадам гуравдугаар сарын 13 хүртэл үргэлжлэх бөгөөд нийт 564 тамирчин 78 төрөлд медалийн төлөө өрсөлдөх юм. Өвлийн паралимпийн зургаа дахь удаагийн наадамдаа оролцож буй эзэн орон БНХАУ-ын баг спортын зургаан төрөлд 73 төрөлд өрсөлдөхөөр 96 тамирчнаа илгээжээ.
