Хүндийг өргөлтийн 87 кг-д өрсөлдсөн гавьяат тамирчин М.Анхцэцэг эцсийн мөч хүртэл медалийн төлөө өрсөлдөж, дөрөвдүгээр байр эзэллээ. Манай тамирчин огцомоор 110 кг-ыг өргөсөн амжилтаар тавд бичигдэж байсан. Улмаар түлхэлттэй өргөлтийн хоёр дахь оролдлогоороо 142 кг-ыг өргөж, дөрөвт орж ирсэн. Түүний хувьд хүрэл медаль хүртэхийн тулд 147 кг-ыг өргөх ёстой байв. Ингээд 147 кг-ыг захиалж, медалийн төлөө эцсээ хүртэл тэмцэхээр болсон. Харамсалтай нь захиалгаа өргөж чадалгүй алдаж, дөрөвдүгээр байр эзэллээ.
Ийнхүү хэдийгээр медаль хүртэж чадаагүй ч Олимпийн наадмын дөрөвдүгээр байрт шалгарна гэдэг том амжилт юм. Монголчуудын Олимпоос медаль хүртдэг ТОП 4 төрөл удахгүй тав болж нэмэгдэх боломжтой гэдгийг М.Анхцэцэг маань тод томруун харуулж чадлаа.
Эмэгтэйчүүдийн 87 кг-ын дүн
1.Ван Жоу Юу (БНХАУ) 120 кг+150 кг=270 кг
2.Т.Салазар (Эквадор) 113 кг+150 кг=263 кг
3.С.Фегуэро (Доминикан) 116 кг+140 кг=256 кг
4.М.АНХЦЭЦЭГ (МОНГОЛ) 110 кг+142 кг=252 кг
