Найруулагч М.Бишрэлийн “Сахиусан тэнгэрийн оронд орхигдогсод” бүтээлээр нээлтээ хийсэн “Алтан өргөө” олон улсын кино наадам амжилттай болж өндөрлөлөө. Энэ удаагийн наадмыг дэлхий нийтийг хамраад буй цар тахлын улмаас онлайн хэлбэрээр зохион байгуулсан ч өмнөх жилүүдийнхээс илүү олон оролцогч бүтээлээ ирүүлж, кино наадмын өрсөлдөөнийг хурцалсан юм. Дөрвөн төрлийн бүтээлийг үзэгчдэд хүргэдэг байсан “Алтан өргөө” наадам энэ жилээс хүүхдийн хүчирхийллийн эсрэг сэдэвтэй киногоор төрлөө баяжуулснаараа онцлогтой боллоо. Найм дахь наадмын олон улсын уралдаант хэсэгт зохион байгуулагчид 28 монгол бүтээл хүлээн авснаас Кино сонголтын хорооныхон 14-ийг нь онцолсон. Тэдгээрийг төрлөөр нь ангилбал баримтат гурав, хүүрнэлт гурав, эксперименталь дөрөв, эксперименталь болон хүүрнэл төрлийн шаардлагыг хангасан хоёр кино байсан юм. Түүнчлэн хүүхэлдэйн кино төрөлд нэг, хүүхдийн хүчирхийллийн эсрэг сэдэвтэй нэг бүтээлийг тус тус шалгаруулсан билээ. Гэхдээ аливаа төрөлд гурваас доошгүй бүтээл уралдаант хэсэгт шалгарсан тохиолдолд тухайн төрөлд шагнал олгоно гэсэн журмын дагуу энэ удаагийн наадмын хүүхэлдэйн болон хүүхдийн хүчирхийллийн эсрэг сэдэвтэй бүтээлийн төрлөөс шагналтан тодруулахааргүй болсон. Харин эдгээр бүтээл дээд шагналын төлөө өрсөлдөх эрхтэй байв.
Наадмын олон улсын уралдаант хэсэгт 70 орны 560 орчим бүтээлийг хүлээн авснаас Кино сонголтын хорооныхон нийт 30 орчим бүтээлийг сонгосон. Тэднээс хэний киног шилдгээр тодруулсныг тоймлон хүргэе.
Дээд шагнал: “Гүнзгий амьсгал” – Ц.Галсандорж, Д.Мөнхбаяр
Шилдэг монгол хүүрнэлт кино: “Аз жаргал” – Г.Номин
Шилдэг монгол баримтат кино: “Тэтгэвэрт гарсан хүүхдүүд” – Г.Баттулга
Шилдэг монгол эксперименталь кино: “Ариутгалын eртөнц” – Х.Анхбаяр
Шилдэг олон улсын эксперименталь кино:
“Мэри, эсрэг тэсрэг Мэри” (Сингапур) – Нельсон Йео
Шилдэг олон улсын хүүхэлдэйн кино:
“Эгч дүүс” (Франц) – Фредерик Эвон, Луиз Меркадье
Шилдэг олон улсын баримтат кино:
“Цаг хугацаа ба түрлэг” (Нидерланд) – Марлен ван дер Верф
Шилдэг олон улсын хүүрнэлт кино:
“Сэргэг бай, бэлэн бай” (Вьетнам) – Пам Тьен Ан
