Д.Болд шилдэг дуунуудаараа пянз гаргажээ

“The Voice of Mongolia” шоуны шүүгч, Төрийн соёрхолт дуучин Д.Болд үнэнч фенүүддээ зориулан цоо шинэхэн пянзаа худалдаанд гаргажээ. “The best of BOLD” нэртэй уг пянзыг 180 граммын тунгалаг винил материалаар хийсэн бөгөөд ковер дизайныг нь өвөрмөц технологи болох гурван хэмжээст солигддог зурагтайгаар хийсэн гэдгээрээ онцлог аж. Түүний хос пянз 200 ам.долларын үнэтэй аж. Дуучин Д.Болдын шинэ пянзанд өмнө нь олны хүртээл болсон 12 цомгоос шилж сонгон оруулсан 19 хит дуу багтсан байна. Жишээлбэл, “Зөвхөн чам руу”, “Хос гэрэлтэх од”, “Гоо амраг”, “Чамдаа хэлье”, “Үүлэн домог” зэрэг шилдэг уран бүтээл нь багтжээ. Дуучин Д.Болд хит уран бүтээлээс бүрдсэн пянзаа Япон улсын “Aubrite mastering” студид хийлгэсэн бөгөөд бүх дуундаа дахин тохиргоо хийлгэсэн гэдгийг тодотгожээ. Тэрбээр үнэнч фенүүддээ зориулан ердөө 500 ширхгийг хэвлүүлж худалдаанд гаргахад бэлджээ. Эхний ээлжинд 100 ширхэг пянз ирээд байгаа юм.