ДЭМБ-ын ерөнхий захирал Тедрос Аданом өчигдөр буюу наймдугаар сарын 24-нд болсон хэвлэлийн бага хурлын үеэр хэлэхдээ, өнөөдрийн байдлаар 172 улс орон, бүс нутаг шинэ төрлийн коронавирусийн вакцины дэлхийн хангалтын төлөвлөгөөнд нэгдэж байна. 2021 оны сүүлчээр дэлхийн хэмжээнд наанадаж 2 тэрбум тун вакцин тараах нь уг төлөвлөгөөний зорилт юм хэмээн мэдэгджээ.
COVAX нэртэй коронавирусийн вакцины дэлхийн хангалтын төлөвлөгөө нь дэлхийд хамгийн өргөн цар хэмжээтэй, төрөл зүйлээр хамгийн баялаг вакцины багц бүтээгдэхүүн юм. Өдгөө 9 төрлийн вакцин энэ төлөвлөгөөнд хамрагдаж байгаа юм байна. “Бид эдгээр вакцинд тасралтгүй үнэлгээ хийж, цаашид сайжруулан, хамгийн сайн бүтээгдэхүүнээр хангахыг баталгаажуулна. Түүнчлэн вакцин үйлдвэрлэлийн бусад 4 компанитай зөвшилцсөөр байна. Үүнээс гадна 9 төрлийн вакцинд урт хугацааны үнэлгээ хийж байна” гэж ДЭМБ-ын тэргүүн танилцуулсан байна.
Тэрбээр вакцины үнэ хэт өндөр байвал дунд, бага орлоготой улс орны иргэдийн вакцины нийлүүлэлтэд нөлөөлөх болно гэдгийг онцолжээ. Мөн цөөн улс орон вакцины хангалтыг эзэмшихэд хүрвэл цар тахал улам удаан хугацаанд үргэлжилнэ. Вакцины эхний шатны хангалт хязгаартай учраас эрүүл мэндийн салбарын ажилтан, 65 наснаас дээших хүмүүсийг багтаасан эрсдэл ихтэй хүмүүсийг хамруулах нь чухал гэдгийг онцолжээ. Вакцины төлөвлөгөөнд их хэмжээний санхүүжилт шаардагдаж байгааг ч ноён Тедрос Аданом мэдээллийнхээ үеэр дурдсан байна.
Эх сурвалж: https://www.who.int/
