Энэ долоо хоногт Засгийн газрын ээлжит хуралдаанаар хийгдсэн томилгоонуудын нэг нь шинээр байгуулагдсан Соёлын яамны гол нэгж болох Соёлын агентлагийн даргын томилгоо байв. Яамныхаа Төрийн нарийн бичгийн дарга болон дэвшсэн Монгол Улсын гавьяат жүжигчин Г.Эрдэнэбатын хашиж байсан Соёлын агентлагийн даргаар сэтгэл судлалын доктор Ц.Нацагдолгор томилогдлоо. Тэрбээр, МАН-ын Бага хурлын гишүүн, тус намын эмэгтэйчүүдийн байгууллага болох НАМЭХ-ны дэд Ерөнхийлөгчийн сонгуульт албыг хашдаг юм байна.
Ц.Нацагдолгор УИХ-ын Тамгын газар, Нийгмийн хамгаалал хөдөлмөрийн яамны газрын дарга, Төрийн банкны газрын захирал, Дэлхийн банкны төслүүдийн удирдагч, хувийн хэвшилд их, дээд сургуулийн захирлаар ажиллаж байсан туршлагатай.
МАН 2020 оны УИХ-ын сонгуульд оролцсон мөрийн хөтөлбөртөө Соёлын яам байгуулна гэдэг заалт тусгасан. Энэ дагуу Соёлын яамыг 30-аад жилийн дараа эргэн сэргээн байгуулаад буй юм. Ерөнхий сайд У.Хүрэлсүхийн Засгийн газрын гол бодлогын нэг нь соёл урлагийг дэмжих, үндэсний өв, соёлоо түгээн дэлгэрүүлэх, хадгалж хамгаалахад чиглэж байгаа. Тиймээс Соёлын яамны гол агентлагийн даргыг цаг алдалгүй томилжээ.
