Хэнтий аймгийн Дэлгэрхаан сумын Хэрлэнбаян-Улаан тосгоны ойролцоо олон тооны өвөгт тогоруу үхсэн тухай мэдээллийн дагуу судлаачид газар дээр нь очиж ажиллажээ. Тэднийг тосгоны төлөөллийн хамтаар ажиллах явцад 15 өвөгт тогоруу, нэг хондон ангир үхсэн байхыг олсон байна. Түүнээс хойш нэмж 20 гаруй шувуу үхсэнийг орон нутгийн мэргэжлийн хүмүүс устгажээ. Үхсэн тогоруунаас дээж болгон шинжилгээнд явуулахад бромадиолин хэмээх мэрэгч устгалын хорны найрлагад ордог химийн бодис илэрсэн байна. Үүнтэй төстэй асуудал 2002 онд манай оронд тохиолдож олон тооны тогоруу болон бусад шувуу, махчин амьтад, мөн хоёр хүүхдийн амь эрсэдсэн тохиолдол гарч байжээ.
Бромадиолин нь буруу хэрэглэсэн тохиолдолд ямар ч амьтдыг үхэлд хүргэх эрсдэлтэй аж. Тиймээс Амьтны эрх хамгаалах, Зэрлэг амьтан судлан хамгаалах нийгэмлэгээс БОАЖЯ болон ХХААХҮЯ-ыг энэ асуудалд анхаарлаа хандуулахыг хүссэн байна.
Эх сурвалж: “Монголын үнэн” сонин
