Хэнтий аймгийн ИТХ-ын 14-р хуралдаанаар өнөөдөр аймгийн Засаг дарга Н.Ганбямба өөр ажилд томилогдох гэж буйтай холбогдуулан “Аймгийн Засаг даргад нэр дэвшүүлэх тухай” асуудлыг хэлэлцжээ. Өнөө өглөө тухайн асуудлаар Хэнтий аймгийн ИТХ дэх Монгол ардын нам бүлэг хуралджээ. Тиймээс Хэрлэн сумын Засаг дарга бөгөөд Чингис хотын захирагч Ц.Идэрбатыг нэр дэвшүүлж, төлөөлөгчдийн олонхи дэмжиснээр түүний нэрийг Хэнтий аймгийн Засаг даргаар батламжлахыг Ерөнхий сайдад өргөн барихаар болсон байна.
Ц.Идэрбат нь багш, төрийн удирдлагын менежер мэргэжилтэй, Хэрлэн сумын Засаг даргын орлогчоор 2008-2012 онуудад ажиллаж байсан, Хэнтий аймгийн МАН-ын хорооны дэд дарга, аймгийн ИТХ-д гурав дахь удаагаа төлөөлөгчөөр сонгогдсон зэрэг ажлын туршлагатай нэгэн юм. Тэрбээр 2016 оноос өнөөг хүртэл эрлэн сумын Засаг дарга бөгөөд Чингис хотын захирагчаар ажиллаж буй.
