Монгол Улсын Засгийн газраас хөдөө, орон нутгийн хөгжлийг дэмжих зорилгоор “Сумын төвийн шинэчлэл” хөтөлбөр хэрэгжүүлэхээр болсон. Энэ хөтөлбөрийг улсын хэмжээнд жишиг байдлаар хэрэгжүүлэхээр эхний ээлжид Архангай аймгийн Эрдэнэмандал, Завхан аймгийн Отгон, Хэнтий аймгийн Батноров, Баянхонгор аймгийн Өлзийт, Өвөрхангай аймгийн Хайрхандулаан гэсэн таван сумыг сонгоод байгаа юм. Энэ таван сумын нэг болох Хэнтий аймгийн Батноров суманд өчигдөр “Сумын төвийн шинэчлэл” хөтөлбөрийн бүтээн байгуулалтын ажил эхэллээ. Уг ажлын нээлтийн ёслолд УИХ-ын гишүүн, Засгийн газрын Хэрэг эрхлэх газрын дарга Л.Оюун-Эрдэнэ, УИХ-ын гишүүн Б.Бат-Эрдэнэ, Барилга, хот байгуулалтын яамны төрийн нарийн бичгийн дарга С.Магнайсүрэн зэрэг албаны хүмүүс оролцжээ.
“Алсын хараа-2050” Урт хугацааны хөгжлийн хөтөлбөрт ч нэр бүхий 99 сумыг эхний ээлжид төрөөс дэмжиж хөгжүүлбэл төвлөрлийг сааруулах, тухайн сумдад ажиллаж, амьдрах таатай орчин бүрдэнэ гэсэн дүгнэлт тусгасан. “Сумын төвийн шинэчлэл”-ийн хүрээнд Батноров суманд Нутгийн удирдлагын ордон, цэвэрлэх байгууламж, 320 хүүхдийн багтаамжтай ЕБС-ийн хичээлийн байрны өргөтгөл зэрэг нийт 4,3 тэрбум төгрөгийн бүтээн байгуулалтын ажлыг хийх юм. “Сумын төвийн шинэчлэл” хөтөлбөрийн хүрээнд тухайн сумын төвд үйл ажиллагаа явуулдаг байгууллагууд, айл өрхүүдийг халуун, хүйтэн ус, дулаан хангамж бүхий дэд бүтцэд холбож, авто зам, цэвэрлэх байгууламж зэргийг нь бүрэн шийдэх ажээ.
