“Орон нутгийн зам-Хөдөлгөөний соёл” арга хэмжээний хүрээнд Тээврийн цагдаагийн албанаас замын хөдөлгөөнд оролцож байгаа жолооч, зорчигч нарт сэрэмжлүүлэг мэдээлэл хүргэх ажлыг зохион байгуулж байгаа ажээ. Тухайлбал, Улаанбаатар-Өндөрхаан чиглэлийн А0501 дугаарын магистрал замд анхааруулах самбар, зөвлөгөө, мэдээллийн цэг байршуулан ажиллаж байгаа юм байна. Орон нутгийн замд зорчиж буй жолооч нарыг сонор сэрэмжтэй, хариуцлагатай байж, замын хөдөлгөөнд соёлтой оролцохыг Тээврийн цагдаагийн албанаас уриалж байна.
Замын хөдөлгөөний аюулгүй байдлын цагаан номд дурдсанаар зам тээврийн ослын улмаас 2019 онд нийт 4351 хүн амь нас, эрүүл мэндээрээ хохирчээ. Үүнээс хөдөлгөөний аюулгүй байдал, тээврийн хэрэгслийн ашиглалтын журмын эсрэг гэмт хэргийн улмаас улсын хэмжээнд 319 хүн амь насаа алджээ. Гэмт хэргийн улмаас амь насаа алдсан хүний 234 буюу 73.4 хувь нь орон нутагт, 85 буюу 26.6 хувь нь нийслэлд бүртгэгдсэнээс харахад орон нутгийн зам осол аваар гарах эрсдэл хамгийн өндөр байгаа юм.
