ОХУ-д түлшний хангамж тогтворжиж, шатахуун түгээх газрууд борлуулалтын хязгаарлалтаа аажмаар цуцалж эхэлжээ.
Хязгаарлалтыг бүрэн цуцлаагүй бүс нутгуудад нэг удаа олгох шатахууны хэмжээг нэмсэн байна. Тухайлбал, өмнө нь нэг удаад 30 литр бензин олгож байсан бол одоо энэ хэмжээг 50 литр болгон нэмжээ.
Нөхцөл байдал ийнхүү сайжирсан нь газрын тос боловсруулах үйлдвэрүүдийн засвар дуусаж, үйл ажиллагаа тогтворжиж эхэлсэнтэй холбоотой гэж шинжээчид үзэж байна.
Хэдийгээр эерэг өөрчлөлт гарч байгаа ч бензин борлуулалтад тавьсан хязгаарлалтыг 10 дугаар сараас нааш бүрэн цуцлах боломжгүй гэж шинжээчид таамаглаж байна. Энэ нь түлш хангалттай нөөцлөх, улирлын эрэлтийн савлагаа зэрэг хэд хэдэн хүчин зүйлтэй холбоотой аж.
