“Эрдэнэс Монгол” нэгдлийн Гүйцэтгэх захирал Б.Даваадалай БНСУ-ын аж үйлдвэрийн тэргүүлэгч “POSCO” группийн “POSCO International” корпорацийн Дэд ерөнхийлөгч Жон Гён Жин нар хамтын ажиллагааны санамжбичигт гарын үсэг зурлаа.
Санамж бичгийн хүрээнд уул уурхай, эрчим хүч, чухал ашигт малтмал боловсруулах чиглэлээр хамтын ажиллагаагаа өргөжүүлж, хамтарсан төсөл, хөтөлбөр хэрэгжүүлэх талаар ярилцав. “Эрдэнэс Монгол” нэгдлийн Гүйцэтгэх захирал Б.Даваадалай: “Ойрын хугацаанд хамтарсан төслүүдийг хэрэгжүүлэх, БНСУ-ын дэвшилтэт технологи, инженерийн туршлагыг Монгол Улсад нэвтрүүлэх, мэргэжилтнүүдийг туршлага судлуулах чиглэлээр хамтран ажиллах сонирхолтой байгаагаа илэрхийллээ.
“POSCO International” корпорацийн Дэд ерөнхийлөгч Жон Гён Жин: “Хоёр улсын ашигт малтмалын салбарын стратегийн түншлэлийг хөгжүүлэхэд чухал хувь нэмэр оруулах санамж бичиг байгуулсныг онцлоод чухал ашигт малтмалын чиглэлээр хамтын ажиллагааг эхлүүлэх өргөн боломж байгааг тэмдэглэлээ.
1968 онд байгуулагдсан “POSCO” групп нь дэлхийн гангийн үйлдвэрлэлийн тэргүүлэгч компаниудын нэг бөгөөд эрчим хүч, дэд бүтэц, барилга, худалдаа, логистикийн салбарт үйл ажиллагаагаа өргөжүүлэн, дэлхийн томоохон тоглогч болоод байна. 51 улсад 128 салбар, төлөөлөгчийн газартай бөгөөд олон улсын худалдаа, эрчим хүч, цахилгаан автомашины нийлүүлэлтийн сүлжээ, хөдөө аж ахуй, био материалын бизнесийн чиглэлээр үйл ажиллагаа явуулж байна.
