Монгол Улсын Ерөнхийлөгч У.Хүрэлсүх зарлиг гаргаж Гавьяат жүжигчин, дуучин Самандын Жавхланд Монгол Улсын Ардын жүжигчин цол хүртээлээ. Ерөнхийлөгч Увс аймаг байгуулагдсаны 100 жилийн ойд оролцох үеэрээ энэхүү хүндтэй цолыг хүртээв.
Дуучин С.Жавхлан 2003-2015 онд Монгол орныхоо бүх аймаг, хотуудаар зургаан удаа тойрч, аялан тоглолт хийж байсан юм. Мөн тэрбээр Монгол туургатнууд аж төрж буй Өвөр Монгол, Шиньжян Уйгурын өөртөө засах орон, Бүгд Найрамдах Буриад Улс, Бүгд Найрамдах Тува Улс, Бүгд Найрамдах Халимаг Улсуудад удаа дараа уригдан очож уран бүтээлээ хүргэсэн юм.
Тэрбээр Япон, АНУ, БНСУ, Европын холбооны улсууд зэрэг дэлхийн 30-аад оронд уран бүтээлийн тоглолт, ая дуугаа өргөсөн байна. С.Жавхлан “Хамаг Монгол” төслийн хүрээнд Буриад, Өвөр Монгол, Халимаг, Тува уран бүтээлчидтэй хамтран томоохон уран бүтээлүүдийг хийсэн нь монгол өв, соёл, урлагаа сурталчлахад үнэтэй хувь нэмэр оруулсан билээ.
С.Жавхлан 2009 онд МУГЖ, 2023 онд Буриад Улсын Гавьяат жүжигчин, 2024 онд Халимаг Улсын гавьяат жүжигчин цолоор тус тус шагнуулж байжээ.
