МҮОНРТ-ийн Үндэсний зөвлөлийн гишүүнээр хоёр жилийн өмнө буюу 2022 оны нэгдүгээр сарын 14-нд сонгогдсон Д.Жавзандорж Гандантэгчэнлин хийдийн тэргүүн их хамба мяндаг тушаалыг хаших болсон тул энэхүү сонгууль ажлаас чөлөөлөгдөх хүсэлтээ өнгөрсөн оны наймдугаар сарын 25-нд Монгол Улсын Ерөнхийлөгчид гаргасан юм байна. Түүний орон тоонд Н.Нанзаддоржийг нэр дэвшүүлсэн тул хуулийн дагуу УИХ-ын Төрийн байгуулалтын байнгын хороон дээр өнөөдөр нэр дэвшигчийн сонсгол зохион байгуулжээ.
Нэр дэвшигч Ноовойн Нанзаддорж нь 1973 онд Улаанбаатар хотод төрсөн. Тэрбээр 1981-1990 онд нийслэлийн ерөнхий боловсролын 47 дугаар дунд сургууль төгсөж, 1991-1995 онд Монголын бурхны шашинтны төв Гандантэгчэнлин хийдийн Дашчойнпэл дацанд шавилан сууж, 1995-2000 онд БНЭУ-ын Goman Monastery University (Datsan)-ийн парчин дамжааг, 2000-2002 онд тус сургуулийн зод дамжааг, 2002-2004 онд умын дамжааг тус тус дүүргэж төгссөн. 2008 онд буддын гүн ухааны гавжийн дамжаа барьсан. Н.Нанзаддорж нь 2005–2008 онд Монголын бурхны шашинтны төв Гандантэгчэнлин хийдэд Захиргааны тэргүүлэгч, 2008-2016 онд тус хийдийн дэд хамба, 2005 оноос хойш Гандантэгчэнлин хийдийн Дашчойнпэл дацанд багшилж байгаа аж.
Байнгын хорооны сонсголоос МҮОНРТ-ийн Үндэсний зөвлөлийн гишүүнд нэр дэвшигч Н.Нанзаддоржийг УИХ-ын чуулганы нэгдсэн хуралдаанд танилцуулахыг дэмжжээ.
