Японы мэргэжлийн сүмогийн намрын башё эхэллээ. Башёгийн эхний өдөр шинэхэн озэки Хоошорюү С.Бямбасүрэн маэгаширагийн хоёр дахь бөх Абиг тоттари мэхээр өвдөг шороодуулан озэки цолтой анхны даваагаа авлаа. Мөн озэки Киришима Б.Лхагвасүрэн комүсүби Тобизарүг давж башёг амжилттай эхлүүллээ.
Их аварга Тэрүнофүжи Г.Ган-Эрдэнэ нурууны мөгөөрсөн жийргэвчийн ивэрхий, чихрийн шижин өвчний шинж тэмдэг илэрсэн учир энэ удаа башёг өнжихөөр болжээ. Тэрбээр долдугаар сарын башёгийн дөрөв дэх өдрөөс өнжсөн бөгөөд нурууны өвдөлтийн улмаас бэлтгэл сургуулилалт хийхэд хүндрэлтэй байгаа аж.
Исэгахама ояката “Түүний нуруу сайнгүй байна. Эмнэлэгт хэвтсэн ч байдал дээрдэхгүй байна” гэжээ. Одоогоор Тэрүнофүжи аваргын нуруунд хагалгаа хийлгэх эсэхээ шийдээгүй байгаа аж. “Хэрэв өвдөлт намдахгүй бол дараагийн арга хэмжээг авах талаар ярилцах болно” хэмээн Исэгахама ояката хэлжээ
Өнгөрсөн оны аравдугаар сард давхар өвдөгний хагалгаанд орж, гурван тэмцээн дараалан өнжсөний дараа Тэрүнофүжи энэ жилийн тавдугаар сарын тэмцээнд түрүүлсэн юм.
