Японы мэргэжлийн сүмогийн зуны тэмцээн нацү башё өндөрлөлөө. Их аварга Тэрүнофүжи Г.Ган-Эрдэнэ өнгөрсөн оны есдүгээр сарын башёг гэмтлийн улмаас дундаас нь орхиж, улмаар аравдугаар сард хоёр өвдгөндөө мэс засал хийлгэн, гурван башё өнжсөний дараа дэвжээндээ эргэн ирж 14 даваа, нэг унаатайгаар итгэл төгс түрүүллээ. Тэрбээр сүүлийн өдөр озэки Такакэйшог ошидаши мэхээр давсан юм. Монголын хоёр сэкивакэ Кирибаяма Б.Лхагвасүрэн, Хоошорюү С.Бямбасүрэн нар өчигдөр оноолт тааран барилдаж Хоошорюү давснаар, хоёулаа 11 даваа, дөрвөн унаатайгаар башёг өндөрлүүлэв. Кирибаяма Б.Лхагвасүрэн өнгөрсөн гуравдугаар сарын башёд түрүүлж, мөн сүүлийн гурван башёгийн давааны нийлбэр 33-аас давсан тул озэки цолонд хүрэх нь тодорхой болов.
Дээд зиндаанд барилдаж буй монгол сүмочдоос Чиёошома Г.Мөнхсайхан, Хокүсэйхо А.Даваанинж нар найман даваа, долоон унаатай буюу 50-иас дээш хувийн амжилтаа үзүүлэв. Харин Тамаваши Б.Мөнх-Оргил, Миторюү Б.Төрболд нар 50-иас дээш хувийн амжилт үзүүлж чадсангүй.
