Мэргэжлийн сүмогийн дээд зиндаанд их аварга Тэрүнофүжи Г.Ган-Эрдэнэ түрүүлэх нь тодорхой боллоо. Тэрбээр өнөөдөр нутаг нэгтэн сэкивакэ Кирибаяма Б.Лхагвасүрэнтэй оноолт тааран барилдаж ёрикири мэхээр өвдөг шороодуулснаар 13 даваа, нэг унаатай болж, нацү башёд түрүүлэх болзлоо хангав. Ийнхүү Тэрүнофүжи Японы эзэн хааны цомыг найм дахь удаагаа өргөхөөр болов. Кирибаямагийн хувьд их аваргад унаснаар 11 даваа, гурван унаатай болж байна. Түүний сүүлийн гурван башёгийн давааны нийлбэр 33-аас дээш болсон тул ирэх долдугаар сарын башёд озэки цолтой барилдах нь тодорхой болоод байгаа юм.
Сэкивакэ Хоошорюү С.Бямбасүрэн өнөөдөр маэгаширагийн 15 дахь бөх Цүрүгишог давснаар 10 даваа, дөрвөн унаатай боллоо. Тамаваши Б.Мөнх-Оргил өнөөдөр учраадаа өвдөг шороодсоноор долоон даваа, долоон унаатай болж, маргааш буюу башёгийн сүүлийн өдөх давбал 50-иас дээш хувийн амжилт үзүүлнэ.
Чиёошома Г.Мөнхсайхан өнөөдөр давснаар найман даваа, зургаан унаатай болж, 50-иас дээш хувийн амжилтаа үзүүлэв. Хокүсэйхо А.Даваанинж өнөөдөр унаснаар найман даваа, зургаан унаатай, Миторюү Б.Төрболд мөн унаснаар дөрвөн даваа, 10 унаатай болжээ.
