Японы мэргэжлийн сүмогийн зуны башёд их аварга Тэрүнофүжи хамгийн түрүүнд найм даван 50-иас дээш хувийн амжилт үзүүлэн, тэмцээнийг ганцаар хошуучилж эхэллээ. Түүнтэй хамт башёг тэргүүлэгчдийн эгнээнд бичигдэж байсан маэгаширагийн зүүн жигүүрийн 6-д эрэмбэлэгдсэн Мэйсэй, 14-т эрэмбэлэгдсэн Асанояма нар өнөөдөр хоёул учраадаа өвдөг шорооджээ.
Манай бөхчүүдээс сэкивакэ Кирибаяма Б.Лхагвасүрэн, Хоошорюү С.Бямбасүрэн нар өнөөдөр учраагаа давснаар зургаан даваа, хоёр унаатай тэмцээнийг үргэлжлүүлж байна. Маэгаширагийн 7-оос босож барилдаж буй Тамаваши Б.Мөнх-Оргил өнөөдөр ээлжит даваагаа авснаар гурван даваа, таван унаатай болоод байна. Маэгаширагийн 11 дэх бөх Хокүсэйхо А.Даваанинж өнөөдөр давж, зургаан даваа, хоёр унаатай болжээ. Чиёошома Г.Мөнхсайхан, Миторюү Б.Төрболд нар өнөөдөр учраадаа өвдөг шороодсоноор хэн хэн нь даваа унаа тэнцээд байна.
