Хэнтий аймгийн Баянхутаг сумын уугуул, Үндэсний шигшээ баг, МИАТ компани, “Хилчин” спорт хорооны тамирчин, Монгол Улсын начин Батжаргалын Одхүүгийн хүү Цэцэнцэнгэл “Парис-2022” Гранд Сламд түрүүллээ. О.Цэцэнцэнгэл аваргын төлөө “Баку-2018” ДАШТ-ий мөнгөн медальт, Азербайжаны Ушанги Кокауриг боох мэхээр цэвэр ялснаар “Абу Даби-2021” Их дуулгын аварга цолоо Паристай ихэрлүүлэв. Түүнээс өмнө +100 кг-д манай жүдочид Гранд Слам ангилалд түрүүлээгүй байсан бөгөөд О.Цэцэнцэнгэл хоёр дараалан түрүүлж, IJF-ийн мэргэжилтнүүдээс “Mongolian Rocket” нэрийг зүүгээд байна. Тэрбээр мөн хагас шигшээд Хаан Риньегийн ялалтын цувралыг зогсоож, Будапешт-2021 дэлхийн аваргад түрүүлсэн Японы Кокоро Кагэүраг ялж, сенсаац тарьсан юм.
