Улаанбаатар хотын Ерөнхий менежер Т.Гантөмөрийг өчигдөр үүрэгт ажлаас нь чөлөөлж, түүний оронд УИХ-ын гишүүн асан Д.Ганболдыг томилжээ. Хотын Ерөнхий менежер асан Т.Гантөмөр тэтгэвэртээ гарч буй тул ийн шинээр томилгоо хийсэн байна. Өнөөдөр тамгаа гардан авсан Ерөнхий менежер Д.Ганболдын хувьд 2016-2020 оны УИХ-ын гишүүнээр Чингэлтэй дүүргээс сонгогдон ажилласан юм.
Тэрбээр Улаанбаатар хотын Налайх районы Ардын депутатуудын хурлын гүйцэтгэх захиргаанаас ажлын гараагаа эхэлжээ. Эдийн засагч, эрх зүйч мэргэжилтэй ч санхүүгийн салбарт олон жил ажилласан энэ эрхэм 1987-1988 онд Улаанбаатар хотын Налайх районы АДХГЗ-ны Санхүүгийн хэлтэст зааварлагч, нягтлан бодогч 1988-1989 онд Дорнод аймгийн Хилийн цэргийн дугаар ангид хилчин байлдагч, 1989-1990 онд Улаанбаатар хотын Сүхбаатарын районы АДХГЗ-ны санхүүгийн хэлтэст ерөнхий нягтлан бодогч, 1990-1992 онд Улаанбаатар хотын АДХГЗ-ны санхүүгийн хэлтэст татвар болон санхүүгийн хяналт шалгалтын улсын байцаагч, 1992-2000 онд Улаанбаатар хотын Чингэлтэй дүүргийн Засаг даргын Тамгын газарт Санхүүгийн хэлтсийн дарга, 2000-2008 онд Нийслэлийн Засаг даргын Тамгын газрын санхүү, төрийн сангийн хэлтсийн дарга, 2008-2016 онд Чингэлтэй дүүргийн Засаг даргаар ажиллаж байжээ.
